| Meles: Al-Shabaab waa in la tirtiraa |
Addis Ababa, 17-Jul-2010 - Ra'isulwasaaraha dalka Itoobiya, Meles Zenawi, ayaa sheegay inaynan jirin xal kale oonan ka aheyn in la tirtiro kooxda sheegata inay xidhiidhka la leedahay al-Qaeda ee dagaallada kula jirta dowlad KMG Soomaaliya, ee al-Shabaab.
Kooxda al-Shabaab ayaa sheegatay masuuliyadda bambooyin lala dhacay dad shacab ah oo Axaddi la soo dhaafay magaallada Kampala ku daawanayey Koobka Kubadda Cagta ee Aduunka, weerarkan ayaa waxaa ku naf-waayey in kabadan 70 qof oonan waxba galabsan.
"Xaqiiqin majirto wax rajo ah oo laga qabo in wadahadal lala galo kooxdan. Majirto waxaanan ka aheyn in dhamaantood la baab'iyo," ayuu yiri Meles.
Meles oo la hadlayey TV-ga dowladda ayaa intaa ku daray, "dadkan aadanaha ayey cadaw u yihiin, waxeyna diyaar u yihiin inay xasuuqaan dad aanan waxba galabsan iyagoonan u kala aabayeeleyn."
Dowladda Itoobiya ayaa in badan isku-dayday inay Soomaaliya ka caawiso dib u askunka qarankoodi, iyadoo ciidan u dirtay dalkaas dhamaadki sanadkii 2006. Itoobiya ayaa ciidankeeda kala soo baxday Soomaaliya, kadib markii ay intii karaankeeda ah ka geysatay xal u helista dhibaatooyinka Soomaaliya.
Meles ayaa farta ku fiiqay xukumadda Eriteriya, maadaama Eriteriya ay xiriir toos ah la leedahay kooxda al-Shabaab.
Dowladaha Itoobiya iyo Eriteriya ayaa dagaal kulul isaga hor-yimid intii u dhaxeysay 1998 illaa 2000, dagaalladaas ayaa qiyaasti waxaa ku naf-waayey 80,000 dad gaaraya.
Ra'isulwasaare Meles ayaa dhawaan shaaca ka qaaday inuu ciidanka difaaca qaranku ka howlgali doono gudaha Soomaaliya markale, hadday dhacdo inay kooxda al-Shabaab la wareegto awooda dalka Soomaaliya.
Kooxda al-Shabaab ayaa weeraro isbada-joog ah ku heysa xarumaha dowladda KMG Soomaaliya ee magaallada Muqdisho.
wabishabeele.com |
|
