| Yusuf Dheeg oo ka noqday hadalkii ahaa in deegaanka Soomaalida la gumeysto |
London, 22-Jul-2010 - Wasiirka Arrimaha Dibadda ee dowladda KMG ah ee Soomaaliya, Yuusuf Ibraahim Xasan (Yuusuf Dheeg), ayaa gabi-ahaanba isaga noqday hadalkii uu dhawaan sheegay ee ahaa in shacabka deegaanka Soomaalidu ay Itoobiya gumeysato.
Yusuf Dheeg oo doraad la hadlayey Laanta Af-Soomaaliga ee BBC, ayaa sheegay inuunan hadalka sidaas u dhihin, islamarkaana ku adkeystay inuunan wax Itoobiya ku saabsan kaba hadal.
Yusuf Dheeg oo booqasho ku marayey dalka Masar ayaa dhawaan wargeyska Al-Yowmu Saabic ku yiri, shacabka deegaanka Soomaalida ee reer Ogadenya waxaa gumeysta Itoobiya, isagoo intaa raaciyey inaynan wax xuquuq ah ku laheyn dalkaas.
Yuusuf Dheeg ayaa BBC-da u sheegay inuu la kulmay wariyayaal u dhashay Masar intii uu Qaahira joogay, islamarkaana uu siiyey wareysiyo dhinacyo badan taabanaya, laakiin iska fogeeyey hadalka ku saabsan Itoobiya iyo deegaanka qowmiyadda Soomaalida.
Masuuliyiinta isaga danbeysay tallada dalka Soomaaliya ayaa in badan, iyagoonan ka fiirsan, dhexgala arrimaha Ismaamulka Deegaanka Soomaalida (Ogaden). Faragalinta noocaas ah ayaa waxey labada dhinac ka haleyso mooyee anaan wanaag badan u keenin.
Bahda warsidaha wabishabeele.com ayaa cambaareyn kulul dusha uga tuuray markii uu hadalkan Yuusuf Dheeg ku soo baxay bogaga internetka.
Aduunka ayaa aqoonsan in qowmiyadda Soomaalida Itoobiya haddii ay Itoobiya ka sii mid noqonayso iyo haddii kale ay tahay howl iyada u taal. Waana faragalinta noocaas ah ee masuuliyiinta Soomaaliya tan maanta qarankii Soomaaliya halkaa dhigtay, deegaanka Soomaalidana (Ogaden) wax badan oo uu heli lahaa ku waayey.
wabishabeele.com |
|
